Jei, frí eru best í heimi. Ég er búin að sofa (og svo sofa dálítið meir), taka til og pakka *hóst* eða svona... byrjuð að pakka allavega! Áðurgreint plús heimsóknir og át er það sem er helst planað um páskana... nææææs. Svo er stefnan bara sett á að flytja fyrir 1. maí múhahaha!
Rosalega góð aðferð sem hægt er að vinna á einum mánuði til að láta eina verktakaskattaskýrslu (tekur soldið lengri tíma en þessar ísípísívenjulegu) virka mjög lítið mál:
1. hafa extra mikið að gera í aðalvinnunni
2. hafa extra extra mikið að gera í aukavinnunni - sérstaklega í heimavinnuhlutanum
3. fá afhenta íbúð og þykjast sinna málun og öðru slíku
4. pakka búslóðinni að hluta
5. taka að sér hátt í tveggja tíma fyrirlestur- sem þarf að búa til nánast alveg frá grunni
6. hafa tímamörkin 25. mars því svo er ferðinni heitið erlendis á ráðstefnu
7. mæta á sem allra flesta mannfagnaði, meðal annars tvær árshátíðir og eitt stórafmæli
8. takmarka svefninn töluvert til að koma þessu öllu í verk
9. verða tvisvar sinnum lasin á þremur vikum - sem svo aftur eykur álagið af lið 1 - 6
NIÐURSTAÐAN: í lok mánaðarins þegar lið 1 - 9 er lokið er ein skitin aumingjaleg verktakaskattaskýrsla eftir, svo lítið mál að það tekur því varla að gera hana. Best að fara á djammið bara!
Hvað á ég nú að raupa um? Það hvað mér finnst gaman að fara og skoða í búðir núna þegar nýjar vörur eru komnar? Það að mér finnst falleg föt í búðargluggum og í fatarekkum, skór, töskur, klútar og treflar jafnast á við heila hauga af súkkulaði (súkkulaðið sívinsæla) - og eins og með súkkulaðið þá langar mig að eiga og borða það allt sjálf? Eða það að ég get ekki beðið eftir að fara til London í lok mars, svoooo gaman að fara til útlanda og sérstaklega ef fagidjótinn fær líka smá útrás? Eða það að það styttist í að ég fái nýju íbúðina mína afhenta (alltof stuttur tími og ég á eftir að gera allt of mikið af því sem ég ætlaði að gera ... en það er svo sem ekki nýtt)? Eða kannski að segja ykkur frá því að ég er byrjuð á annarri lopapeysu? Sem fæstum finnst kannski merkilegt en mér finnst jafnast á við að ég hafi klárað eitt doktorsverkefni og sé að fara að byrja á öðru! Stefnan er tekin á að þessi lopapeysa passi börnum eldri en sex ára og helst að hún passi á mig! Eða ætti ég kannski að nefna það að drykkjuleikir yfir undankeppni júró á Íslandinu eru ein hraðvirkasta og hættulegasta brautin til blakkáts? Eða ætti ég kannski að röfla um launamálin mín? Nenni því reyndar ekki... Jújú ég segi bara allt gott, er á leið í Ikea og ætla að eyða kvöldinu í að glápa á Heroes (sumum þykir þetta kannski bera vott um plebbaskap en hvað með það - ég er plebbi! :D )
Ég er búin að nota útsölurnar vel fyrir undirbúning næstu mánaða, útsölur í húsgagnaverslunum til að ná mér í sófa og rúm, og útsölur í fatabúðum til að vera vel klædd við flutningana... Fann rosa flottan sófa í Ego Dekor, virkaði rosa penn í búðinni við hliðina á hinum hlunkunum. Það kom síðan í ljós að penheitin eru afstæð, sófinn komst ekki inn í (gömlu) íbúðina mína! Fær því að dúsa í kjallaranum með kurteislegu afsökunarbréfi handa nágrönnunum... Það gekk nú betur með rúmið – enda hægt að taka það í sundur í fleiri einingar – setti það upp í gær og var auðvitað alltaf að kíkja á það annað slagið. Flissaði alltaf eins og smástelpa þegar ég sá það, ekki bara ánægjunnar vegna með að eiga nýtt og fínt rúm, heldur vegna þess að það er svo hátt að ég þarf að klifra upp í það (nær mér nánast í mitti)! Ætlaði að sjálfsögðu ekki að fá mér svona ammerískt rúm en svo snýst mér oft svo hratt hugur að ég var búin að kaupa það áður en ég vissi af – og hæstánægð! Sýnist það allavega endanlega komið á hreint að ég þarf að leigja mér lyftara þegar kemur að flutningunum og taka öll stóru fínu húsgögnin mín inn um svaladyrnar...!
Langaði bara til að deila því með ykkur hvað ég er orðinn mikill sjónvarpsfíkill - hmm eða sjónvarpsþáttafíkill öllu heldur. Mæli með eftirfarandi þáttum tíhíhí
Arrested Development - Marry me! þarf ég að segja meira... skilst að það hafi verið gerðir 13 þættir í 3. seríu sem ég VERÐ að koma höndum yfir, á bara fyrstu tvær búhúú
Grey's Anatomy - jömmí - búin með fyrstu seríuna og hálfa aðra seríuna og ef ég væri með betri tölvu eða tölvutengingu (hvoru megin sem vandamálið liggur) þá væri ég komin með alla þætti sem til eru í heiminum!
Eins og þetta sé ekki nóg (og ég er örugglega að gleyma einhverjum) þá er alltaf viðeigandi að grípa í gamla Sex & the City þætti, Little Britain, LOST, Desperate Housewives (koma þeir ekki örugglega bráðum á RÚV??), Pride & Prejudice og fleiri og fleiri...
OK það er ekki fyndið hvað það er búið að taka langan tíma að skrifa þessa færslu.. þessi tveggja ára tölva mín er eins og hún sé tvöhundruð ára, faaaaaaan!
Frestunaráráttan að drepa mig, búin að fresta svooo mörgum færslum hingað inn síðustu vikur af því að það er of mikil fyrirhöfn að skrá mig inn. Núna meika ég alls ekki að slá inn lista þannig að bloggið nær því, í þetta sinn, að vera forðunarhegðun tíhíhí
Miklir flutningar framundan næstu mánuði, bæði er vinnan að flytja og svo ég. Ótrúlegt en satt þá gat ég valið mér íbúð, keypt og núna standa málin þannig að ég bíð bara eftir afhendingu - á næsta ári :D Spurning hvað ég get frestað tiltekt í fataskápnum og skjalaskápum mikið lengur, örugglega slatta samt...
æj ég veit ekki hvað ég á að segja meira, nenni ekki að tala um heimsmálin, menningu eða slíkt, best að setja bara mynd af einum af mínum uppáhaldsleikurum - jömmí - verst að hann er kvæntur því annars hefði ég farið og leitað hann uppi! Núna!
ég ætlaði að skrifa eitthvað en mér dettur ekkert í hug
...
hmm
...
jamm
...
jæja
...
kannski smá öppdeit fyrir þá sem ég tala sjaldan við (af því að þið eruð ekki á msn! og ef einhverjir eru þarna sem eru ekki á msninu hjá mér og ég tala sjaldan/aldrei við þá megið þið kvitta!! :D). Ég er ekki búin að kaupa íbúð. Ég er enn á lausu. Ég er hress og kát. Ég er enn að vinna á sömu stöðum og venjulega. Ég hljóma eins og auglýsing á einkamálum. Ég er lítil, krútt, matargat, löt, skapstygg á morgnana en samt ljúf sem lamb. Ég er .............
Múhahaha auðvitað endaði Magni með flest atkvæðin. Af hverju getum við ekki verið eins dugleg að mótmæla, já ég veit ekki, t.d. ójöfnuði í samfélaginu, hækkun bensínverðs o.s.frv. Djö værum við þá í góðum málum :D
Hvaða dýr væruð þið ef þið væruð ekki manndýr? Af ýmsum sem mér dettur í hug þá væri ég líklega krummi því ég er alltaf í svörtu og elska allt sem glitrar! Þvoði þvott í vikunni sem er svo sem ekki í frásögur færandi nema af því að þegar ég var búin að hengja hann á snúruna, snéri mér frá en sá snúruna út undan mér þá stafaði af henni geislum, sindrandi fallegum silfruðum og gylltum geislum. Mér fannst það fallegt.
